Fimmtudaginn 20. maí kl. 20 heldur Vígþór Sjafnar Zophoníasson, ásamt Jónasi Ingimundarsyni, tónleika í Kirkju- og menningarmiðstöðinni í Fjarðabyggð.
Vígþór Sjafnar Zophoníasson mun ljúka námi til meistaragráðu í einsöng við tónlistar- og dansdeild háskólans í Missouri Kansas City í vor. Þar hefur hann m.a. lært söng hjá Vinson Cole. Vígþór Sjafnar útskrifaðist sem Bachelor of Music með einsöng sem aðalgrein frá New England Conservatory í Boston vorið 2008 með „akademískum“ heiðri.
Í maí síðastliðnum var Vígþór Sjafnar valinn framúrskarandi listnemi Kópavogsbæjar 2009.
Tónleikarnir á Eskifirði eru styrktir af Menningarráði Austurlands. Miðar verða seldir við innganginn.
Continue reading „Vígþór Sjafnar og Jónas á Eskifirði fimmt. 20. maí kl. 20“
Systurnar Rannveig Sif og Hólmfríður Sigurðardætur halda tónleika á Stokkalæk þriðjudaginn 18. maí kl. 20 og slá svo botninn í Tíbrártónleika vetrarins í Salnum, fimmtudaginn 20. maí kl. 20. Efnisskráin samanstendur af sönglögum frá Frakklandi, Þýskalandi og Spáni eftir samtímamennina Reynaldo Hahn, Gabriel Fauré, Hans Pfitzner og Manuel de Falla. Öll eru lögin í rómantískum anda þótt þau beri merki landanna þar sem þau eru samin.
Ágúst Ólafsson, barítónsöngvari, og Gerrit Schuil, píanóleikari, bjóða áhorfendum til morguntónleika þrjá sunnudaga í röð í Fríkirkjunni í Reykjavík þar sem fágætt tækifæri gefst til að njóta með stuttu millibili beggja ljóðasöngflokka Schuberts auk söngvasafns sem gefið var út að honum látnum undir heitinu Svanasöngur.