Dúlcineurnar þær Guðrún Ingimarsdóttir, sópran, Anna Guðný Guðmundsdóttir, píanó og Sigrún Eðvaldsdóttir, fiðla koma fram tónleikum Listafélags Langholtskirkju, sunnudagskvöldið 17. október kl. 20. Á efnisskránni eru verk þar sem þær koma fram allar saman eða tvær og tvær. Aría úr Brúðkaupskantötu eftir Bach, sónata fyrir fiðlu og píanó eftir Handel, svíta fyrir söngrödd og fiðlu eftir Villa Lobos, konsertaríur eftir Mozart og Melody op. 42 eftir Tsjækofskí eru meðal verkanna. Listakonurnar hafa um árabil verið í fremstu röð íslenskra tónlistarmanna og hafa starfað saman við ýmis tækifæri.
Verð til listafélaga er kr. 2000, almennt verð kr. 2.500
Söngleikhúsið Lífsins karnival verður fært á svið í Íslensku óperunni fimmtudagskvöldið 21. október kl. 20. Á tónleikunum mun söngkonan Ingveldur Ýr ásamt sérlegum gesti, Garðari Thór Cortes tenórsöngvara, flytja lög af nýútkomnum geisladiski Ingveldar Ýrar, Portrett, auk þess sem óvæntir leynigestir munu líta inn. Á diskinum er að finna þversnið af fjölbreyttum ferli Ingveldar Ýrar, þar sem heyra má söngleikjatónlist og dægurlög í bland við óperuaríur og klassísk sönglög í útsetningum Þorvaldar Bjarna Þorvaldssonar. Flutt verða ýmis lög úr smiðju Kurt Weill, Leonard Bernstein, Andrew Lloyd Webber, Giuseppe Verdi og Francis Poulenc, Jóns Ásgeirssonar og Þorvaldar Bjarna Þorvaldssonar, svo dæmi séu nefnd, og mun Garðar Thór m.a. flytja lög úr Vesalingunum, Óperudraugnum og hinum nýfrumflutta söngleik Webbers, Love never dies. Hljóðfæraleikur er í höndum Antoníu Hevesi auk þess sem notast er við hljóðfæraleik af diskinum sjálfum, sem var í höndum Caput-hópsins. 